agt-maniere-om-jou-kind-teen-skade-te-beskerm Agt maniere om jou kind teen skade te beskerm

Kinders kan enige tyd van die jaar beserings opdoen, maar dit is gewoonlik gedurende die somerseisoen dat ons beserings by kinders sien styg. Volgens prof Sebastian van As, Hoof van die Trauma-eenheid by die Rooikruis Kinderhospitaal, is motorongelukke, verdrinking en brandwonde die algemeenste redes waarom kinders in die hospitaal beland, veral gedurende die vakansie.

Sanlam se beseringseise weerspieël die Rooikruis Kinderhospitaal se statistieke. Padongelukke is die grootste gevaar vir kinders – verantwoordelik vir 80% van traumagevalle. Ongelukkig is dit dikwels die gevolg van kinders wat nie behoorlik vasgegespe is nie. Maar daar is ook ander gevare.

“Die koste van hierdie onvoorsiene gebeure kan hoog wees – van verlengde hospitaalverblyf tot rehabilitasie en berading. Netcare gee ’n geskatte daaglikse gemiddelde van R20,796 vir gespesialiseerde intensiewe sorg (insluitend pediatriese sorg), wat behandeling en mediese sorg uitsluit,” sê Dr Marion Morkel, Hoof Mediese Beampte by Sanlam.

Die Kindersiekte- en Beseringsvoordeel van Sanlam vul bestaande dekking aan om bykomende finansiële verligting te bied vir minder ooglopende uitgawes en tekorte. Die premies is mededingend en kinders kwalifiseer vir dekking vanaf hulle eerste verjaarsdag tot hulle 19 word.

Alhoewel jy versekering soos gapingsdekking, mediese fonds en die Sanlam Kindersiekte- en Beseringsvoordeel kan uitneem, is die beste manier om jou kind teen besering en siekte te beskerm om dit te probeer voorkom óf om maatreëls in plek te stel om die risiko te verminder.

Hier is ’n paar wenke wat kan help om jou kind veilig te hou:

1. Beveilig jou huis: Brandwonde by kinders is dikwels erger as by volwassenes. Maak seker dat warm toestelle, giftige stowwe en skerp voorwerpe nie binne jou kinders se bereik is nie. Hou kaste gesluit en hou kinders weg van vuurhoutjies, paraffien en aanstekers. Beveilig jou badkamer. Moet nooit jou kind sonder toesig in die bad of stort los nie. Hou hulle weg van warm geisers. Verduidelik aan hulle hoekom sekere dinge verbode is en hoekom dit gevaarlik is.
2. Beveilig jou tuin en binnenshuise plante: Hou giftige plante buite bereik of verwyder dit uit jou tuin en huis.
3. Swembad- en waterveiligheid: Vir elke kind wat weens verdrinking sterf, word vyf met permanente breinskade gelaat. Maak seker jou swembad is bedek, of maak seker dit is veilig toegemaak en gesluit om te verhoed dat kinders inval. Moenie toelaat dat hulle sonder toesig in die swembad of met ’n emmer water speel nie (verdrinkings kan ook in vlak water voorkom). As ’n ekstra rugsteun, leer jou kinders van kleins af swem om te verseker dat hulle weet wat om te doen as hulle in ’n swembad val.
4. Voorkom verstikking: Jy kan voorkom dat kinders verstik deur te verseker dat hulle klein happies kos eet. Maak seker dat jy en die mense wat vir jou kinders sorg, goed vertroud is met eerstehulp-tegnieke wat vir kinders en babas ontwerp is – dié tegnieke verskil tussen volwassenes en kinders.
5. Motorveiligheid: Maak altyd seker dat jou kind ’n veiligheidsgordel dra. As jou kinders jonk of babas is, moet hulle in ’n motorstoeltjie sit wat spesifiek vir hul lengte en ouderdom ontwerp is.
6. Padveiligheid: Hou toesig oor klein kinders op paaie en leer ouer kinders van voetgangerveiligheid. Leer hulle om ’n helm te dra as hulle op ’n fiets, skaatsplank of iets soortgelyks is.
7. Leer hulle noodnommers: Jou kinders kan jou lewe – sowel as hul eie – red deur belangrike noodnommers te memoriseer. Plak die telefoonnommers vir die polisie (10111), ambulans of brandweer (101777) en noodgevalle (112) op jou yskas of binne maklike bereik of sig van al jou familielede.
8. Beskerm hulle teen die son: Velkanker kan dodelik wees en sonbrand kan die kanse verhoog om velkanker te ontwikkel. Wanneer dit warm is, maak seker dat jou kinders sonskerm en beskermende klere dra.